Il chantun Grischun è giast d’onur a la OLMA 2022 a Son Gagl. Dals 13 fin ils 23 d’october 2022 sa preschenta el a la fiera publica la pli gronda da la Svizra sco chantun attractiv d’abitar e da lavurar ed er sco chantun tradiziunal e modern da turissem, da furmaziun e d’agricultura. Uniuns ed organisaziuns vegnan envidadas da cooperar al til tradiziunal da la OLMA.

Il Grischun è chantun ospitant a la OLMA 2022. Uschia ha il Grischun la pussaivladad da sa mussar ad in vast public a medem temp sco chantun attractiv d’abitar e da lavurar sco chantun tradiziunal e modern da turissem, da furmaziun e d’agricultura. Durant il «Di dal chantun ospitant» preschentan las uniuns e las organisaziuns grischunas participantas en ina moda e maniera viva la ritgezza da las tradiziuns e da l’innovaziun sco er la diversitad culturala ed economica dal Grischun. Las uniuns ed organisaziuns interessadas che vulan sa participar al «Di dal chantun ospitant» da sonda, ils 15 d’october 2022, vegnan envidadas da cooperar. Il til da la OLMA dal chantun ospitant cun var 700 participantas e participants tras il center da Son Gagl vegn accumpagnà da var 25 000 aspectaturas ed aspectaturs. Tras quai è el ina vitrina prominenta vers il Grischun.

Dapi l’onn 2003 Grischun per l’emprima giada puspè chantun ospitant

La fiera svizra per agricultura e nutriment «OLMA» vala sco la fiera publica la pli gronda da la Svizra e dura 11 dis. Ella attira mintga onn passa 300 000 visitadras e visitaders ed ha lieu dals 13 fin ils 23 d’october 2022. Il chantun Grischun è stà l’ultima giada l’onn 2003 chantun ospitant. En il rom da l’exposiziun speziala e d’ulteriuras activitads vegn il Grischun ad esser preschent al lieu per l’entira durada da la OLMA.

La primavaira 2022 vegn ill chantun ad infurmar detagliadamain davart la cumparsa dal Grischun sco chantun ospitant a la OLMA.

Contact per las uniuns ed organisaziuns interessadas che vulan sa participar al «Di dal chantun ospitant»: umzug@olma22.gr.ch

Foto: Michael Huwiler