La gievgia proxima, ils 13 d’october 2022, vegn averta a Son Gagl la OLMA – cun il Grischun sco chantun ospitant. Ina part impurtanta da la represchentaziun grischuna èn persunalitads grischunas ed animals dal Grischun.

La OLMA n’è betg mo la pli gronda fiera publica da la Svizra. Ella è er l’inscunter il pli impurtant da l’agricultura svizra. La halla 7 da la OLMA è perquai deditgada cumplainamain als animals da niz da l’agricultura ed ad auters animals sin il bain puril. Sco chantun ospitant dastga il Grischun mussar differentas razzas d’animals indigenas en la stalla da la OLMA. Da vesair èn sis razzas d’arments da charn (angus, razza brina originala, limousine, simmental, charolaise, razza grischa). Plinavant viageschan tschintg razzas da vatgas da latg a la OLMA (brown swiss, holstein, fleckvieh, jersey, razza brina originala). Medemamain mintgamai tschintg razzas han las persunas responsablas grischunas selecziunà tar las nursas (nursa alva alpina, nursa engiadinaisa, nursa da las eglieras nairas, nursa muntagnarda brin naira, berrichon du cher) e tar las chauras (chaura strala grischuna, chaura-pavun, nera verzasca, chaura alpina da colur-chamutsch, capra grigia). Tut quellas razzas vegnan allevadas en il Grischun u èn evidentamain colliadas cun l’agricultura e cultura grischuna. Tut en tut è l’agricultura grischuna represchentada cun passa 50 animals a la OLMA. Il chantun dastga mussar ses animals durant l’entira exposiziun er en l’arena (guardar «Program preschentaziuns d’animals dal chantun ospitant Grischun»).

Il Grischun preschenta ina nova tecnica da 3D

Cun in eveniment fitg innovativ sa preschenta il Grischun en l’exposiziun speziala «Mund d’aventuras dal Grischun»: cun holograms da 3D da las persunalitads grischunas Marie Louise Werth (musicista), Tonia Maria Zindel (actura), Marc Berthod (victur da la cuppa mundiala da skis e commentader da SRF) ed Arno Camenisch (scriptur). In hologram è in maletg che mussa ina copia illuminada traidimensiunala d’in object oriundamain fotografà. A la OLMA vegn applitgada la medema tecnica sco en il kino traidimensiunal. Dentant na stattan las visitadras ed ils visitaders betg mo davant ina suletta taila, mabain tranter quatter tailas. En il «Mund d’aventuras dal Grischun» discurran ils holograms da las quatter persunalitads schizunt. Els baterlan davart regurdientschas da l’atgna uffanza, davart lur projects actuals e davart la societad en general. La nova tecnica è vegnida sviluppada da la Scola auta spezialisada dal Grischun. Sco vusch grischuna a la OLMA vegn la moderatura Annina Campell ad accumpagnar la represchentaziun grischuna durant l’entira exposiziun. Ella moderescha er las preschentaziuns d’animals grischuns. Cun in eveniment fitg innovativ sa preschenta il Grischun en l’exposiziun speziala «Mund d’aventuras dal Grischun»: cun holograms da 3D da las persunalitads grischunas Marie Louise Werth (musicista), Tonia Maria Zindel (actura), Marc Berthod (victur da la cuppa mundiala da skis e commentader da SRF) ed Arno Camenisch (scriptur). Il «Mund d’aventuras dal Grischun» po vegnir scuvrì durant ils 11 dis da la fiera en la halla 9.1.2. La sonda, ils 15 d’october 2022, stat il di dal chantun ospitant Grischun sin il program, cun in cortegi tras Son Gagl (a las 10.00) e cun in act festiv en l’arena da la OLMA (a las 14.00). Il cortegi vegn transmess sin TV Ostschweiz e sin suedostschweiz.ch.

Viadi a la OLMA

Tgi che viagia cun ils meds da transport publics a la OLMA, survegn, en cumbinaziun cun il bigliet da RailAway, in rabat d’entrada da 20 pertschient. La purschida vegn vendida sin sbb.ch/olma u als spurtegls da las staziuns. Il di dal chantun ospitant, ils 15 d’october 2022, recumonda l’organisaziun da la OLMA urgentamain da viagiar cun il traffic public. Per il viadi cun il vehichel a motor exista in access signalisà a la plazza da park+ride betg gratuita Breitfeld, cun transfer cun bus a la OLMA.

Preschentaziuns d’animals dal chantun ospitant Grischun

Gievgia, ils 13 d’october a las 10.30

Venderdi, ils 14 d’october a las 11.00

Sonda, ils 15 d’october a las 10.00
Sonda, ils 15 d’october a las 10.30

Glindesdi, ils 17 d’october a las 13.00

Mardi, ils 18 d’october a las 12.00
Mardi, ils 18 d’october a las 14.30

Mesemna, ils 19 d’october a las 10.30
Mesemna, ils 19 d’october a las 14.00

Gievgia, ils 20 d’october a las 10.30

Venderdi, ils 21 d’october a las 12.00

Sonda, ils 22 d’october a las 10.15

Dumengia, ils 23 d’october a las 13.30

Permanentamain

Preschentaziun d’animals en l’arena

Protecziun da muntaneras:

Cortegi cun animals grischuns
Preschentaziun d’animals en l’arena

Protecziun da muntaneras

Aucziun da la razza brina cun participaziun d’animals
Preschentaziun d’animals en l’arena

Preschentaziun d’animals en l’arena
Di dals chavals

Preschentaziun d’animals en l’arena

Di da las vatgas da latg: show da razzas d’elita cun animals

Preschentaziun d’animals en l’arena

Preschentaziun d’animals en l’arena

Exposiziun da muvel en la halla 7 cun animals grischuns